Skiednis

2014 Stichting Nijjiersrevu De Jouwer bestiet út in entûsjaste ploech minsken die´t jierliks in Jouster nijjiersrevu op de planken sette wol. Doe´t de Fryske Krite nei 27 jier ophold mei de revu, hat dizze ploech op 10 en 11 jannewaris 2014 harren earste (de 28ste) nijjiersrevu op ´e planken set mei it tema: “Frjemde Fûgels”. Út de entûsjaste reaksjes en it oantal besikers (700 oer trije foarstellingen) blyk dat der genôch belangstelling is foar in nijjiersrevu.

2015 Op 9 en 10 jannewaris 2015 hat de twadde (de 29ste) nijjiersrevu plak fûn mei it tema: “In wiete boel”. Ek hjirop wiene oer it generaal de reaksjes posityf. Der wiene 730 besikers yn trije foarstellingen.

2016 De tredde (30ste) nijjiersrevu mei it tema: “Út en Thús” hat plak fûn op 8, 9 en 16 (middeis en jûns) jannewaris 2016. Omdat it in jubileumrevu wie, hat de organisaasje besletten om dizze kear fjouwer foarstellingen te jaan. It publyk wie tige entûsjast en dat die ek wol bliken út it oantal besikers fan dizze revu: 950.

2017 Op 7, 13 en 14 (middeis en jûns) jannewaris 2017 hat ús fjirde (31ste) nijjersrevu plak fûn mei it tema “Fjoer en flam”. De reaksjes fan de media (kranteresinsjes) wienen sa as de foargeande jierren wer posityf. It oantal besikers nimt hieltyd ta. Dizze kear wie dat: 986.

2018 It tema fan de fiifde (32ste) nijjiersrevu wie “Wy dogge noch in rûntsje!”. Oer de fjouwer foarstellingen op 6, 12 en 13 jannewaris 2018 koene wy 944 besikers wolkom hjitte; mei troch de hearskjende gryp krekt wat minder as ferline jier. De resinsjes wiene ek dit jier wer net mis.

2019 “Hulten en Bulten” sa hjit de sechsde (33ste) Nijjiersrevu. Leafst 1.011 besikers kamen yn jannewaris 2019, ferdield oer 4 foarstellingen, nei ’t Haske. Se wiene poer entûsjast, lykas de kranten. It doel fan ús foarsitter om op 999 besikers te kommen, wie hjir mei behelle.

2020 Yn jannewaris 2020 wûn Niijiersrevu de Jouwer De Kultuerpriis De Fryske Marren 2019. Yn it foar hiene we net betinke kinnen dat it tema fan de 34e Niijjiersrevu “Grut, Grutter, Grutsk” sá tapaslik wêze soe! Ek grutsk wiene wy op it nije besikersrekord fan 1.015, ferdield oer 4 foarstellingen. De reaksjes wiene oer it algemien wer hiel posityf.

2021 Nei de simmer fan 2020 gie de ploech fan start mei de tariedingen foar de 35ste Nijjiersrevu “Keallepoaten, sturtklokken en oare kofje”. Sa’t elkenien wit hearske doe de coronapandemie. Yn novimber 2020 moasten de rippetysjes ophâlde; de jildende maatregels fan it RIVM lieten it net langer ta. De 35e Nijjiersrevu moast in jier útstelt wurde. Nijjiersrevu De Jouwer hat doe besletten yn jannewaris 2021 de revu by de minsken thús te bringen en brocht in spesjale jubileumkrante út.

2022 Ein 2021, Besocht de revu het op ’e nij. De ploech wie der hast klear foar en doe… gie alles wer ticht en dus koe de revu ek net foar it fuotljocht brocht wurde. De ploech woe en koe net noch in jier wachtsje en hat doe besletten it oars as oars te dwaan. De 35e revu waard in Neijiersrevu en stie yn oktober 2022 einlings op ’e planken. It waard in smûk, lyts feestje yn húskeamersfear. 642 besikers wiene der ferdield oer 5 foarstellingen by!

2024 “Op ’e Hichte” wie it tema fan de 36e Nijjiersrevu. Nei de coronapandemie wer de earste normale revu. It wie ôfwachtsjen hoe’t dat wer gean soe. Sa’n 820 minksen kamen ferdield oer 5 foarstellingen yn jannewaris 2024 nei it Haske om in foarstelling te sjen en sy wiene dêrnei wer hielendal op ’e hichte fan alles wat der yn en om ’e Jouwer spilet. It dekôr wie it âlde postkantoar en midden yn ’e seal stie in grutte loftballon, sadat it publyk wol ris yn beweging moast om alles sjen te kinnen. De revuband siet dizze kear rjochts foar it poadium.

2025 De reade tried yn jannewaris 2025 wie “(T)Sjoch!” In tema wêrmei de 37e Nijjiersrevu ferskillende kanten út gie: sjen, proaste, de man as frou dy’t altyd toarst hat, op syk nei in bril, geselligens by de Jouster horeka, ensfh. Dit jier hiene we 4 foarstellingen en dêr kamen 855 besikers op ôf. It publyk wie gâns út ‘e skroeven nei it sjen fan dizze revu: de reaksjes wiene geweldich posityf! Mei in catwalk as ferlingstik fan it poadium wie der in soad dynamyk yn de foarstellingen en dat pakte goed út. It dekôr wie ôfwikseljend in café en dan wer in part fan de Midstrjitte.